Erpinetik igarotzen ez den eta simetria-ardatzarekiko perpendikularra den plano batek kono zirkular baten azal bat ebakitzean sortutako kurba. Hortaz, zirkunferentzia koniko itxia da. Halaber defini daiteke zirkunferentzia honela: zentro izeneko puntu finko baterainoko distantzia berdina duten planoko puntuen leku geometrikoa; edota honela: elipsearen kasu partikularra da, a = b denean. Hauek ditu ekuazioak:
Kartesiarra: $(x-a{)}^2+(y-b{)}^2=r^2$
Parametrikoak: $x=a+r\text{cos }\theta$, $y=b+r\text{sin }\theta$; $\theta \in [\mathrm{0,2}\pi )$ izanik.
Polarra: ${\rho }^2-2{\rho \rho }_0\text{cos }(\theta -{\theta }_0)+{\rho }_{0^2}=r^2$, zentroaren koordenatu polarrak ${\rho }_0$ eta ${\theta }_0$ izanik.
Zentroaren eta zirkunferentziako edozein punturen arteko distantzia erradioa da eta r luzerakoa da. Zentrotik igarotzen den zuzenak zirkunferentzia ebakitzen duen puntuen arteko segmentua diametroa da eta 2r luzera du. Zirkunferentziaren diametro guztiak dira simetria-ardatzak. Zenbait ezaugarri:
Zentroa: (a,b)
Eszentrikotasuna: e = 0
Zirkuluaren azalera: πr²
Zirkunferentziaren luzera: 2πr.