Oxigeno molekularrak eragiten duen oxidazioa inhibitzeko gaitasuna duen konposatu organikoa. Oxidazio-erreakzioan, erradikal askeak sortzen dira, eta horiek ezabatzen dituzte antioxidatzaileek, edo haiek berak oxidatzen dira, eta beste oxidazio-erreakzioak inhibitu. Antioxidatzaileek garrantzi handia dute hainbat arlotan eta prozesutan. Izaki bizidunetan, antioxidatzaileen funtzioa oxigenoaren erreaktibotasun handiaren ondorioei kontra egitea da, zelulak eta ehunak suntsitzea eragozteko. Paradoxikoa da, izan ere, organismo gehienek bizitzeko oxigenoa behar izatea, baina aldi berean oxigenoaren eragin suntsitzailetik begiratzeko mekanismoak behar izatea. Egun ezagutzen diren antioxidatzaile nagusienak dira zenbait bitamina (alfa-tokoferolak edo E, beta-karotenoak edo A eta C) eta oligoelementu batzuk (selenioa, kobrea eta zinka). Teknologian, antioxidatzaileak elikagaigintzan eta materialetan erabiltzen dira, besteak beste.