Naturaren azterketaz arduratzen diren zientziak. Arlo nagusiak dira materia eta energiaren zientziatzat jo ohi diren fisika eta kimika, unibertsoa ikertzen duten astronomia eta astrofisika, Lurraren zientziak (geologia, mineralogia, geografia, meteorologia, ozeanografia, paleontologia...) eta biziaren zientziak (biologia, biokimika, genetika, mikrobiologia, botanika, zoologia, ekologia, anatomia, fisiologia, medikuntza...). Natura-zientzien barnean, eskuarki, metodo zientifikoa erabiltzen duten diziplinak sartu ohi dira, giza eta gizarte-zientzietatik zein zientzia zehatzetatik eta logikatik bereizteko.