Ingurune-adimenaren kontzeptua honela azal daiteke: erabiltzaileak interfaze adimendun eta intuiziozkoez inguratuta daude, mota guztietako objektuen artean murgilduta, eta ingurunea gai da zenbait gizabanako ezagutzeko eta haien presentziari erantzuteko, betiere modu erraz, ez-intrusibo eta ez oso ikusgaian. Ezaugarri nagusia zera da: pertsonak dira informazioaren gizartearen puntu nagusia. Ingurune-adimenak aukera emango dio erabiltzaileari informazio-trukea kudeatzeko eta ingurunearen elkarrekintza eraginkorra eta esfortzurik gabea izateko, adibidez, mugimenduak eta giza hizkuntza ulertzen dituzten interfazeen bidez.

Definituriko ingurune-adimenaren testuinguruari gagozkiola, eta egungo joerak eta sektoreko euskal enpresen potentziala kontuan izanda, hainbat enpresa-aplikazio identifikatu dira. Aplikazioen nondik norako estrategikoa eta etorkizunera begirakoa kontuan izanda, EAErako “apustu” gisa har daitezke.

Ingurune adimendun terminoa Europan sortu da. Europako Batzordeak talde bat sortu zuen ingurune adimendunak zer izango ziren eta zein erabilera edo aplikaziotan oinarrituko ziren definitzeko.

Ingurune bat adimenduna dela esaten da honako baldintzak betetzen direnean: nabaritzen ez den moduan funtzionatzea, zenbait teknologiaren arteko elkarrekintza baliatzea eta ingurune horretako erabiltzaileek eskatzen dutena lortzen laguntzea, bai lanean, baita etxean ere.

Ingurune-adimena

Horretarako, teknologia hauetako batzuen konbinazioa erabiliko da:

• Sentsore-sareak (SS).

• Hari gabeko komunikazio-sareak.

• Sareen segurtasuna.

• Informazioa.

• Errealitate birtuala, gehitua eta mistoa.

• Edukiaren tratamendurako teknologiak.

• Teknologia biometrikoak.

• Pertsona-tresna interfazeak.

• Teknologia semantikoak.

• Laguntza-teknologiak.

Ingurune-adimenaren helburuak, azken batean, hauek dira:

• Pertsonekin modu naturalean erlazionatzeko gai izatea. Horretarako, ahotsa ezagutu, keinu batzuk interpretatzen jakin, irudi batzuk ulertu edo azaldu eta antzeko gauzak egiteko gauza izan behar du.

• Erabiltzaileak zein egoerak ezagutzea, behar den laguntza zein den aurreikusteko (context awareness).

Azkenik, inguruneak adimendun bihur daitezke hainbat lekutan:

• Etxean eta horren inguruan (garajea, igogailua...).

• Garraio pribatu nahiz publikoan.

• Lan-inguruneetan.

• Leku pribatu eta publikoetan.

• Janzteko arropa.

Azken batean, gizakiaren ekintzak burutzen diren edozein ingurune bihur daiteke adimendun, teknologia egokia erabiltzen bada.

Ingurune adimendunak nonahi