Oro har, sekuentzia nagusitik gora kokatuta dauden izarren izen generikoa. Sekuentzia nagusiko masa bereko izarrekin konparatuta, tamaina eta argitasun handikoak dira. Eskuarki, erraldoi gorriak eta supererraldoiak berezi ohi dira; Yerkes edo MKK sailkapenean, berriz, erraldoiak III argitasun-klaseko izar-mota dira, azpierraldoien (IV) eta erraldoi distiratsuen (II) artekoa. Izarren bilakaeran, erraldoiak sekuentzia nagusiko izarren ondorengo urratsa dira; hain zuzen ere, izar nanoek beren guneko hidrogeno gehiena helio bihurtu dutenean sortzen dira.