Fanerozoiko eonaren (eta eontemaren) lehenengo era (eta eratema), Proterozoikoaren ondorengoa eta Mesozoikoaren aurrekoa, duela 570 milioi urtetik duela 245 milioi urtera arte iraun zuena. Sei periodo (eta sistema) ditu: Kanbriarra, Ordoviziarra, Siluriarra, Devoniarra, Karboniferoa eta Permiarra. Paleozoikoko fosilen artean ornogabeak nagusi dira; ornogabe asko desagertu ziren era honen amaierako suntsipenean, hala nola trilobiteak eta graptoliteak. Paleozoikoan, arrainen eboluzioa gertatu zen, eta lehenengo anfibioak azaldu ziren. Hiru orogenia nagusi gertatu ziren: Asintiarra, Kaledoniarra eta Hertziniarra edo Variskarra. Euskal Herrian, Paleozoikoko arrokak Pirinio aldean azaleratzen dira, Gipuzkoako ipar-ekialdean, Nafarroako iparraldean eta Lapurdi, Nafarroa Beherea eta Zuberoako hegoaldean.