Nitrogenoz eta oxigenoz osatutako konposatuak (NO_x). Airean gertatzen diren errekuntza guztietan eratzen dira. Airearen poluzioaren ikuspegitik, nagusiak nitrogeno monoxidoa edo oxido nitrikoa (NO) eta nitrogeno dioxidoa (NO₂) dira. Poluzio-ondorio nagusiak smog fotokimikoa eta euri azidoa dira. Atmosferara isurtzen diren nitrogeno-oxido gehienen jatorria erregai fosilen errekuntza (bereziki tenperatura handian egiten direnak) eta hainbat industria-prozesu dira. Emisioak murrizteko bide bat, hortaz, errekuntza-tenperatura txikiagoko prozesuak erabiltzea da. Bestetik, ibilgailuen errekuntza-gasetan bihurgailu katalitikoaren bidez murritz daitezke nitrogeno-oxidoak.